Artykmaç glýukozany çykarýan täze enjam oýlap tapyldy

Barlagçylar artykmaç glýukozany böwrekler arkaly çykarmaga we madda çalşygyna täsir etmäge ukyply täze elektron enjamy tanyşdyrdylar. Bu tehnologiýa diabeti bejermegiň usullarynda düýpgöter täze sahypa açyp biler.

Laboratoriýa synaglary enjamyň täsiriniň örän çalt we netijelidigini görkezdi. Gan şekeriniň derejesi bary-ýogy bir sagadyň içinde kadaly ýagdaýa geldi. Beden energiýa almak üçin ýaglary has işjeň ulanmaga başlady. Şeýle hem beden agramynyň we gandaky trigliseridleriň derejesiniň peselmegine syn edildi.

Implantyň düzüminde glýukoza sensory bar we ol smartfon bilen aragatnaşyk saklaýar. Gan şekeriniň derejesi ýokarlananda, enjam awtomatiki usulda işe girýär. Dereje kadaly ýagdaýa gaýdyp gelende bolsa, ol awtomatiki öçýär. Bularyň hemmesi insulin sanjymlary ulanylmazdan amala aşyrylýar.

Bu netijeler umyt beriji bolsa-da, tehnologiýa henizem synag tapgyrynda galýar. Diýmek, alnan netijeler enjamyň häzirki wagtda adamlarda diabeti ýa-da semizligi howpsuz we doly bejerip biljekdigini aňlatmaýar.

Şeýle-de bolsa, bu ylmy açyş geljekde süýji keseline garşy göreşmek we madda çalşygyna gözegçilik etmek usullaryny düýpgöter üýtgedip biler.