Aşgabatda Halk Maslahatynyň mejlisi geçirildi

Aşgabatda Türkmenistanyň Konstitusiýasynyň esasynda hereket edýän we halkyň bähbitlerine wekilçilik edýän ýurduň ýokary wekilçilikli edarasy — Halk Maslahatynyň nobatdaky mejlisi geçirildi.

Mejlis «Maslahat köşgi» köşgünde geçirildi. Oňa türkmen halkynyň Milli Lideri, Halk Maslahatynyň Başlygy Gurbanguly Berdimuhamedow baştutanlyk etdi. Mejlisiň işine Mejlisiň deputatlary, Ministrler Kabinetiniň Başlygynyň orunbasarlary, ministrlikleriň we pudak edaralarynyň ýolbaşçylary, hormatly ýaşulular, jemgyýetçilik guramalarynyň, köpçülikleýin habar beriş serişdeleriniň hem-de ýurduň jemgyýetçilik wekilleri gatnaşdylar.

Ýeri gelende bellesek, Halk Maslahatynyň öňki mejlisi 2025-nji ýylyň 19-njy sentýabrynda Aşgabatda bolup geçipdi.

Gahryman Arkadagymyz ýygnananlara ýüzlenip, Garaşsyz, hemişelik Bitarap Watanymyzyň mukaddes Garaşsyzlygynyň şanly 35 ýyllyk baýramynyň bellenilýän günlerinde asylly däplerimize eýerip, Türkmenistanyň Halk Maslahatynyň mejlisiniň geçirilýändigini aýtdy we oňa gatnaşyjylaryň öňünde çykyş etdi.

Türkmen halkynyň Milli Lideri Garaşsyzlyk ýyllarynyň dowamynda ägirt uly işleriň amala aşyrylandygyny, Türkmenistanyň dünýäniň abraýly hem-de kuwwatly döwletleriniň birine öwrülendigini, geçen taryhy döwrüň dowamynda ýurdumyzyň syýasy-diplomatik, durmuş-ykdysady, medeni-ynsanperwer ulgamlarda belent sepgitlere ýetendigini, Berkarar döwletiň täze eýýamynyň Galkynyşy döwründe ýurdumyzyň bedew batly ösüşini ynamly dowam edýändigini belledi.

Gahryman Arkadagymyz Garaşsyzlyk toýumyz eziz Watanymyza bolan milli buýsanjymyzy has-da berkidip, täze üstünlikleri gazanmaga we belent sepgitlere ýetmäge güýç-kuwwat berjekdigine berk ynam bildirdi.