Lebap welaýatynda saýlaw toparlary täzeden döredildi

Etrap, şäher saýlaw toparlarynyň ygtyýarlyk möhletiniň tamamlanandygy sebäpli Lebap welaýatynda saýlaw toparlary täzeden döredildi. Türkmenistanyň Saýlaw kodeksiniň 18-nji maddasyna laýyklykda etrap, şäher saýlaw toparlarynyň täze düzümine agzalyga wekilleri hödürlemek işleri syýasy partiýalaryň, jemgyýetçilik birleşikleriniň welaýat we etrap, şäher guramalarynyň mejlislerinde, şeýle hem raýatlar toparlarynyň ýygnaklarynda guramaçylykly amala aşyryldy.

Türkmenabat şäher we Çärjew, Darganata, Dänew, Döwletli, Farap, Garabekewül, Halaç, Hojambaz, Kerki, Köýtendag, Saýat etrap saýlaw toparlarynyň täze düzümine agzalyga Türkmenistanyň Demokratik partiýasyndan wekilleriň 37-si, ýurdumyzyň Senagatçylar we telekeçiler partiýasyndan 4-si, Türkmenistanyň Agrar partiýasyndan 12-si, ýurdumyzyň Kärdeşler arkalaşyklaryndan 37-si, Türkmenistanyň Zenanlar birleşiginden 10-sy, Türkmenistanyň Magtymguly adyndaky Ýaşlar guramasyndan 21-si, raýatlar toparlaryndan 11-si, jemi 132-si hödürlenildi.

Hödürlenilen wekilleriň jemi sanynyň 33,33 göteriminiň zenanlar we 30,30 göteriminiň ýaşlardyr.

Türkmenistanyň Saýlaw kodeksiniň 32-nji maddasyna laýyklykda etrap, şäher saýlaw toparlarynyň düzümine agzalyga wekil hödürlemek hakyndaky syýasy partiýalaryň, jemgyýetçilik birleşikleriniň mejlisleriniň we raýatlar toparlarynyň ýygnaklarynyň beýanlary esasynda etrap, şäher saýlaw toparlary welaýat saýlaw topary tarapyndan täzeden döredildi.

Bu saýlaw toparlaryny täzeden döretmek işleri Merkezi saýlaw topary tarapyndan tassyklanylan meýilnama esasynda, bellenilen möhletde guramaçylykly geçirildi.