«Collins» sözlügi ýylyň trend sözüni yglan etdi

Meşhur «Collins» iňlis dili sözlügi häzirki zaman iňlis dilinde giňden ulanylýan we meşhurlyk gazanan sözi kesgitledi. Bu gezek 2026-njy ýylyň sözi hökmünde «mogging» atly ýaşlar adalgasy saýlanyp alyndy. Bu adalga kimdir biriniň beýlekilerden haýsydyr bir aýratynlygy boýunça üstün çykmagyny ýa-da artykmaçlyk gazanmagyny aňladýar.

Ilkibaşda bu düşünje diňe daşky keşbe we görnüşe degişli bolan bolsa, wagtyň geçmegi bilen onuň ulanylyş çäkleri has-da giňeldi. Sözüň gelip çykyşy barada aýdylanda, ol «toparyň alfa erkek adamy» diýen manyny berýän «AMOG» (Alpha Male of the Group) gysgaltmasyndan gözbaş alýar. Bu adalga 2010-njy ýyllaryň ortalarynda sporta ýöriteleşen internet forumlarynda, şeýle hem «manosfera» diýlip atlandyrylýan onlaýn jemgyýetlerde giňden ýaýrap başlapdy.

Häzirki döwürde bu söz Z (Gen Z) we Alfa nesilleriniň arasynda hakyky trende öwrüldi. Ýaşlar ony degişme, ýumor ýa-da ýeňil bäsleşik häsiýetinde ulanyp, kimdir biriniň töweregindäkilerden has owadan, özüne çekiji ýa-da haýsydyr bir ugurda has öňdebaryjy bolandygyny suratlandyrýarlar.

Ulanylýan ýagdaýyna görä, «mogging» sözi hem öwgi, hem-de ýaňsylaýjy degişme manysyny berip biler.