Mekdepde ýene bir ýyl okamak Alsgeýmer keseliniň howpuny peseldýärmi?

Alymlaryň täze geçiren barlaglary mekdepde ýene-de bir ýyl köp okamagyň garrylyk döwründe ýadyň gowşamagyna we Alsgeýmer keseline garşy özboluşly gorag bolup biljekdigini görkezdi. Britan alymlary 1972-nji ýylda Beýik Britaniýada amala aşyrylan bilim reformasynyň netijelerini öwrenipdirler. Şol döwürde mekdebi gutarmagyň iň pes ýaşy 15 ýaşdan 16 ýaşa çenli ýokarlandyrylypdy.

Barlagçylar Britan biobankynyň maglumatlaryna daýanyp, 1957-nji ýylyň sentýabryna çenli we ondan soň doglan adamlaryň saglyk ýagdaýyny deňeşdirdiler. Hut şu serhet öňki düzgün boýunça 15 ýaşynda okuwy tamamlajak bolanlar bilen täze düzgün boýunça ýene bir ýyl köp okamaly bolanlaryň arasyndaky tapawudy ýüze çykarmaga mümkinçilik berdi.

Özgertme sebäpli goşmaça bir ýyl bilim alan adamlaryň arasynda Alsgeýmer keseli bilen bagly ýagdaýlar takmynan 0,88 göterim az duş gelipdir. Barlagyň dowamynda gatnaşyjylaryň genleri hem öwrenildi. Alsgeýmer keseliniň döremek töwekgelçiligini ýokarlandyrýan APOE4 geni bolan adamlarda hem goşmaça bir ýyl okuwyň keseliň ýüze çykma ähtimallygyny peseldip biljekdigi bellige alyndy.