237 million ýyl ozalky jandaryň galyndysy tapyldy

Hytaýda deňiz şertlerinde ýaşamaga doly uýgunlaşan gadymy amfibiýanyň täze görnüşi — Gerrothorax oceanicus ýüze çykaryldy.

Paleontologlar takmynan 237 million ýyl ozal ýaşan bu gadymy jandaryň örän gowy saklanan iki sany doly nusgasyny Hytaýyň Guýçžou welaýatynyň çäklerinden tapdylar.

Ylmy barlaglaryň netijesinde deňiz gurşawyna doly uýgunlaşan bu ýerde-suwda ýaşaýan görnüşe Gerrothorax oceanicus ady berildi.

Uzynlygy takmynan 90 santimetre ýeten bu jandaryň ýasy we giň göwresi berk süňk gapagynyň içinde ýerleşipdir.

Häzirki zaman amfibiýalary şor suwda ýaşap bilmese-de, alymlar bu gadymy görnüşiň öz ýaşaýyş şertlerine nädip uýgunlaşandygyny düşündirmäge synanyşýarlar.

Olaryň pikiriçe, G. oceanicus derisi arkaly suw çalşygyny çäklendirip, artykmaç duzlary žabralary arkaly daşary çykarypdyr.