Si Szinpin Türkmenistanyň Prezidentini doglan güni mynasybetli gutlady

Hytaý Halk Respublikasynyň Başlygy Si Szinpin Türkmenistanyň Prezidenti Serdar Berdimuhamedowy doglan güni mynasybetli tüýs ýürekden gutlady we iň gowy arzuwlaryny beýan etdi.

«Geçen ýyl Siziň Şanhaý Hyzmatdaşlyk Guramasynyň Týanszin sammitine hem-de ikinji jahan urşunda hytaý halkynyň gazanan ýeňşiniň 80 ýyllygyna bagyşlanan dabaralara gatnaşmak üçin Hytaýa amala aşyran saparyňyzyň dowamynda Pekinde geçiren duşuşygymyzda Hytaý bilen Türkmenistanyň arasynda däp bolan dostlukly gatnaşyklary hem-de dürli ulgamlardaky özara bähbitli hyzmatdaşlygy mundan beýläk-de pugtalandyrmak boýunça pikir alyşdyk.

Men hytaý-türkmen gatnaşyklarynyň ösdürilmegine uly üns berýärin we iki ýurduň halklarynyň bähbidine Hytaýyň hem-de Türkmenistanyň «Bitewi ykbal bileleşigini» gurmagy ilerletmek üçin bilelikde tagalla etmäge taýýardyryn. Size berk jan saglyk, işiňizde üstünlikleri arzuw edýärin» diýlip, Si Szinpiniň gutlagynda bellenilýär.