Türkmenistanyň Prezidenti Gyrgyzystana bardy

Türkmenistanyň Prezidenti Merkezi Aziýa döwletleriniň Baştutanlarynyň we Azerbaýjan Respublikasynyň Prezidentiniň gatnaşmagynda geçiriljek resmi däl duşuşyga gatnaşmak üçin iş sapary bilen Gyrgyzystan Respublikasyna bardy.

Türkmenistanyň Prezidentini “Yssyk-Köl” halkara howa menzilinde Gyrgyzystan Respublikasynyň Ministrler Kabinetiniň Başlygy — Prezidentiň Diwanynyň ýolbaşçysy Adylbek Kasymaliýew garşylady.

Yssyk-Köl welaýatynyň Çolpon-Ata şäherinde geçirilýän duşuşygyň dowamynda sebit ýurtlarynyň döwlet Baştutanlary däp bolan hyzmatdaşlygy pugtalandyrmak, syýasy, söwda-ykdysady we medeni-ynsanperwer ugurlarda döwletara gatnaşyklary giňeltmek meselelerini ara alyp maslahatlaşarlar.

Şeýle hem olar sebit we halkara gün tertibiniň özara gyzyklanma bildirýän möhüm meseleleri boýunça pikir alşarlar.