Emeli aň arkaly 20 ýyl mundan ozal ogurlanan surat tapyldy

Italiýa polisiýasynyň medeni gymmatlyklary goraýjy bölümi ýene-de bir üstünlikli işi amala aşyrdy. Takmynan 20 ýyl mundan ozal ýurduň Sulmona şäherindäki ybadathanadan ogurlanan gymmatly surat Parma şäherinde geçirilen gadymy zatlaryň ýarmarkasynda tapyldy. XVII asyra degişli bu sungat eserinde Rimli keramatly Agnessanyň keşbi şekillendirilipdir.

Iň gyzykly tarapy, jenaýatçylar suratyň asyl keşbini gizlemek maksady bilen oňa düýpli üýtgeşmeler girizen hem bolsalar, döwrebap tehnologiýalar bu hilegärligi ýüze çykaryp bildi. Hukuk goraýjy edaralar ogurlanan taryhy we medeni gymmatlyklary gözlemek üçin «Swoads» atly ýörite emeli aň ulgamyndan peýdalanýarlar.

Statistiki maglumatlar hem bu ulgamyň netijeliligini görkezýär. 2023-nji ýylyň noýabr aýyndan bäri bu intellektual programmanyň kömegi bilen umumy bahasy 203 million ýewrodan gowrak bolan 300-den gowrak iri sungat eseri, şeýle hem 165 müňe golaý teňňe, medal we golýazma yzyna gaýtaryldy.

Algoritm sungat eserleriniň reňk öwüşginlerini, çyzuw aýratynlyklaryny we iň ownuk tapawutlandyryjy alamatlaryny mikroskopik derejede seljerýär. Onuň esasy artykmaçlygy — surat üýtgedilen ýagdaýynda-da asyl nusgany tanap bilmegidir. Häzirki wagtda italiýaly hünärmenler bu ugurdaky halkara hyzmatdaşlygyny has-da giňeldip, 2027-nji ýyla çenli medeni gymmatlyklary gözlemegiň has kämil we bütin dünýäni birleşdirýän umumy ulgamyny döretmegi meýilleşdirýärler.