Koreýa Respublikasy döwlet talyp haky maksatnamasyna gatnaşmaga çagyrýar

Koreýa Respublikasynyň Bilim ministrliginiň ýanyndaky Milli halkara bilim instituty (NIIED) daşary ýurtly dalaşgärler üçin 2027-nji ýylyň bakalawr derejesinde «Global Korea Scholarship» (GKS) döwlet talyp haklary maksatnamasyna resminamalary kabul edip başlandygyny yglan etdi. Maksatnamanyň çäklerinde Türkmenistandan iki dalaşgär, biri umumy ugur boýunça, beýlekisi bolsa «R-GKS» maksatnamasy boýunça kabul ediler.

Bilim maksatnamasynyň düzüminde koreý dilini öwrenmek boýunça bir ýyllyk taýýarlyk okuwy göz öňünde tutulandyr, şondan soň talyplar 4-den 6 ýyla çenli dowam edýän bakalawr ugurlarynda okuwlaryny dowam etdirip bilerler.

Bäsleşige gatnaşmaga 2002-nji ýylyň 1-nji martyndan soň doglan, ýaşy 25-den geçmedik, şeýle hem 2026-njy ýylyň 31-nji dekabryna çenli orta mekdebi ýa-da orta hünär okuw mekdebini (kolleji) tamamlan ýa-da tamamlaýan Türkmenistanyň raýatlary çagyrylýar.

Arzalar şu ýylyň 15-nji sentýabrynda başlandy we 30-njy sentýabrynda Koreýanyň wagty bilen sagat 18:00-a çenli kabul edilýär. Bäsleşige gatnaşmak üçin «Study in Korea» bitewi maglumat ulgamynda hasaba alynmaly we arza tabşyrmaly. Türkmen ýa-da rus dilinde taýýarlanan resminamalara olaryň iňlis dilindäki terjimesi hökman goşulmalydyr.

Resminamalary deslapky saýlap almagyň netijeleri hem-de söhbetdeşligiň geçiriljek seneleri baradaky maglumatlar şu ýylyň 8-nji oktýabryndan soň dalaşgärleriň her birine aýratynlykda habar berler.

Dalaşgärlere bildirilýän has giňişleýin talaplar, resminamalary tabşyrmak boýunça gözükdirijiler we ýokary okuw mekdepleri baradaky anyk maglumatlar bilen maksatnamanyň resminamalarynda hem-de «Study in Korea» internet platformasynda tanşyp bilersiňiz.

Maksatnama boýunça ýüze çykýan soraglar boýunça Koreýa Respublikasynyň Türkmenistandaky ilçihanasyna aşakdaky telefon belgisi arkaly ýüz tutup bilersiňiz:

+993-12-94-72-86