ADNOC/XRG kompaniýasynyň uly wise-prezidenti Bassem Tadrosyň OGT 2026-da eden çykyşy

Hormatly Alyhezretler, hormatly myhmanlar, hanymlar we jenaplar!

Baý taryhy, myhmansöýerligi we başarnykly adamlary bilen tanalýan Türkmenistanda siziň bilen bile bolmak meniň üçin uly hormatdyr.

Türkmenistanyň Prezidenti, Onuň Alyhezreti Serdar Berdimuhamedowa hem-de türkmen halkynyň Milli Lideri, Halk Maslahatynyň Başlygy Onuň Alyhezreti Gurbanguly Berdimuhamedowa tüýs ýürekden minnetdarlygymy bildirýärin.

Şu ýyl dünýäniň dürli ýurtlaryndan gelen energetika pudagynyň ýolbaşçylarynyň bu abraýly ýygnagynda ADNOC-nyň XRG kompaniýasynyň wekili hökmünde yzly-yzyna üçünji gezek çykyş edýändigime örän şat.

OGT maslahaty ADNOC üçin möhüm döwürde geçirilýär. Häzirki wagtda biz noýabr aýynda Abu-Dabide dünýä energetika pudagynyň wekillerini ADIPEC maslahatynda kabul etmäge taýýarlanýarys.

Aşgabatda başlan gepleşiklerimizi Abu-Dabide hem dowam etdirip bileris diýip umyt edýärin.

Üstünlikli hyzmatdaşlygyň taryhy

Soňky ýyllaryň dowamynda Türkmenistandaky hyzmatdaşlygymyz hem-de ýurduň energetika geljegine bolan ygrarlylygymyz ep-esli ösdi.

Türkmenistana bolan ygrarlylygymyz diňe sözlerde beýan edilmeýär. Ol uzak möhletleýin maýa goýumlarynda, umumy jogapkärçilikde we geljege gönükdirilen hyzmatdaşlykda öz beýanyny tapýar.

Biziň güýçli we barha ösýän gatnaşyklarymyz Türkmenistanyň Hazar deňzindäki böleginde ýerleşýän deňizdäki 1-nji blok gaz we gaz kondensat känlerinde 38 göterim paýly gatnaşygymyza daýanýar.

Önümi paýlaşmak baradaky şertnama operator hökmünde PETRONAS kompaniýasyny, XRG-ni we «Hazarnebit» döwlet kärhanasyny «Türkmennebit» döwlet konserni bilen hyzmatdaşlykda birleşdirýär.

Häzirki wagtda 1-nji blok günde 400 million kub futa çenli tebigy gaz öndürýär we 7 trillion kub futdan gowrak tebigy gaz serişdelerine elýeterlilik berýär. Şeýle hem geljekde önümçiligi artdyrmak üçin mümkinçilik bar.

ADNOC-nyň XRG kompaniýasy bilen PETRONAS «Türkmengaz» döwlet konserni bilen uzak möhletleýin gaz satyn almak-satmak baradaky ylalaşyga gol çekdiler. Bu hyzmatdaşlyk üpjünçiligiň durnuklylygyny, ykdysady gymmatlygy we Türkmenistanyň uzak möhletleýin energetika maksatlaryny goldamaga gönükdirilendir.

Uzak möhletleýin ygrarlylyk

ADNOC we XRG üçin bu diňe bir strategik maýa goýumy däl, eýsem Türkmenistana uzak möhletleýin ygrarlylykdyr.

Bu hyzmatdaşlyk hökümetleriň arasyndaky gatnaşyklary güýçlendirýär, Hazar sebitindäki gatnaşygymyzy giňeldýär we wagtyň geçmegi bilen has çuň hyzmatdaşlyk üçin binýat döredýär.

Biz bu ýerdäki hyzmatdaşlygymyza Türkmenistanyň ileri tutýan ugurlaryna we onuň energetika geljegini ugrukdyrýan milli institutlaryna uly hormat bilen çemeleşýäris. Sebäbi energetika hyzmatdaşlygy ähli taraplar bir ugurda hereket eden mahaly üstünlikli bolýar.

Biziň nukdaýnazarymyzdan esasy mesele uzak möhletleýin hyzmatdaşlygyň ygtybarly energiýa üpjünçiligi, netijeli maýa goýumlary we türkmen halky üçin dowamly gymmatlyk arkaly ähli gyzyklanýan taraplaryň ileri tutýan ugurlaryny nähili goldap biljekdigidir.

Türkmenistanyň maşgalalary, kärhanalary we jemgyýetleri üçin energetika hyzmatdaşlygy diňe ygtybarly üpjünçiligi hem-de ykdysady mümkinçilikleri goldaýan mahaly hakyky ähmiýete eýe bolýar.

Ygtybarlylyk we amatly baha jemgyýet üçin peýdaly bolan amaly ileri tutulýan ugurlardyr.

Şeýle hem jogapkärçilikli energetika ösüşini gepleşikleriň merkezinde saklamalydyrys.

Howpsuzlyk, daşky gurşaw meseleleri we netijeli dolandyryş maýa goýum kararlarynyň ilkinji tapgyryndan başlap göz öňünde tutulmalydyr.

Ygtybarlylyk, elýeterli baha we jogapkärçilik biri-birine garşy goýulmaly maksatlar däl-de, bilelikde garalýan ugurlar bolmalydyr.

Hyzmatdaşlygyň güýji

Biz iň güýçli hyzmatdaşlygyň ähli gyzyklanýan taraplar üçin netijeleri gowulandyrmak bilen birlikde täze mümkinçilikleri hem getirýändigine ynanýarys.

Türkmenistanyň iň uly güýji onuň öz mümkinçilikleridir: milli institutlarynyň bilimleri, energetika hünärmenleriniň tejribesi we halkynyň maksatlary.

Halkara gatnaşygy degişli tejribäni, bilimleri we täze garaýyşlary getirip, şu binýady has-da ösdürmelidir.

Deňagramly hyzmatdaşlyk dürli mümkinçilikleri milli maksatlaryň töwereginde birleşdirýär.

Ýerli şertleri bilmek, tehniki tejribe we uzak möhletleýin maýa goýum garaýşy hyzmatdaşlar öz jogapkärçiliklerini aýdyň paýlaşyp, özara hormat goýýan mahaly has uly peýda berýär.

Uzak möhletleýin hyzmatdaş hökmünde biz strategik laýyklyga, ýokary hilli hyzmatdaşlara we öz tejribämiziň kabul edýän ýurduň maksatlaryna ýardam edip biljek mümkinçiliklerine üns berýäris.

Türkmenistanda biz bu üç şertiň ählisini aýdyň görýäris.

Adamlar we ýerli gymmatlyk hem bu bahalandyrmagyň möhüm bölegidir.

Bu ygrarlylyk Aşgabadyň merkezinde ýerleşýän, ýokary başarnykly we tejribeli türkmen hünärmenleri bilen üpjün edilen barha giňelýän ofisimizde aýdyň görünýär.

Türkmenistan bilen gatnaşyklarymyzyň ösmegi we gülläp ösmegi bilen bu gatnaşygymyzy has-da giňeltmäge sabyrsyzlyk bilen garaşýarys.

Düzgün-nyzamly çemeleşme

Uzak möhletleýin maksatlara diňe höwes bilen ýetip bolmaýar. Olar diňe oýlanyşykly we düzgün-nyzamly kararlar hem-de şol kararlary durmuşa geçirmek üçin ynam arkaly ygtybarly bolýar.

Düzgün-nyzamly maýa goýum üçin serişdä, ony özleşdirmek üçin zerur infrastruktura, täjirçilik esaslaryna we netijeleri üpjün etjek institutlara gowy düşünmek zerurdyr.

Düzgün-nyzamly maýa goýum serişdeleri her bir mümkinçilik boýunça birnäçe esasy meseläni seresaply seljermegi talap edýär: strategik laýyklyk, tehniki taýdan durmuşa geçirip boljakdygy, bäsdeşlige ukyply ykdysadyýet, aýdyň dolandyryş we hakyky tapgyrlaýyn ýerine ýetiriş.

Dykgatly taýýarlyk we döredijilikli çözgütler kabul edýän ýurduň hem-de onuň hyzmatdaşlarynyň uzak möhletleýin bähbitlerini goramak bilen kynçylyklary ýeňip geçmäge mümkinçilik berýär.

Şonuň üçin Türkmenistan ADNOC-nyň XRG kompaniýasynyň global gaz portfeliniň barha möhüm bölegine öwrülýär.

Bu ýerde biz güýçli hyzmatdaşlary, goldaw berýän hökümeti, başarnykly adamlary we özara bähbitli hyzmatdaşlyga umumy ygrarlylygy tapdyk.

Uzak möhletleýin maksatlara gönükdirilen düzgün-nyzamly maýa goýumlar tutuş jemgyýet üçin peýda döredip biler.

Jemleýji söz

Sözümi tamamlap, Türkmenistanyň halkyna we ýolbaşçylaryna, şeýle hem ýurduň ähli künjegindäki hyzmatdaşlarymyza minnetdarlyk bildirmek isleýärin.

Siziň myhmansöýerligiňiz, ýolbaşçylyk edişiňiz we dünýä energetikasynyň meselelerini bilelikde çözmäge bolan ygrarlylygyňyz üçin tüýs ýürekden minnetdardyrys.

Türkmenistan sebitleýin energetika hyzmatdaşlygynda öňdebaryjy orun eýeleýär.

Ýurdüň tebigy serişdeleri Türkmenistana ýakyn onýyllyklarda energetika howpsuzlygyna möhüm goşant goşmaga mümkinçilik berýär.

Bilelikde biz has ygtybarly, has elýeterli we has jogapkärçilikli energetika geljegini dörederis.

Sag boluň.