Zaha Hadid gaznasy Londonda täze döredijilik merkeziniň açyljakdygyny yglan etdi

Londonyň Klerkenwell etrabynda ýerleşýän we sebitleýin binagärlik hem-de sungat merkezine öwrüljek täze medeni giňişligiň açylyşyna taýýarlyk görülýär. Bu bina ozal meşhur binagär Zaha Hadidiň studiýasynyň baş edarasy hökmünde 30 ýyllap hyzmat edipdi.

Obýekti täzeçe taslamalaşdyrmak işi «Studio KA» binagärlik toparyna ynanyldy. Hünärmenler taryhy binanyň binagärlik aýratynlyklaryny we öňki bezeg unsurlaryny saklamak bilen bir hatarda, onuň birinji gatyny dikeltdiler hem-de gelen myhmanlaryň erkin we amatly hereket etmegi üçin giňişligi döwrebaplaşdyrdylar.

Gaznanyň direktory Arik Çen bu barada öz garaýyşlaryny beýan edip: «Zahanyň döredijilik mirasy hut şu ýerde dowam eder. Biz muny geljege gönükdirilen maksatnamalarymyz hem-de sergilerimiz arkaly amala aşyrarys» diýip belledi.

Täze sungat meýdançasynyň resmi açylyş dabarasy noýabr aýyna meýilleşdirilýär. Çäräniň çäginde Binagärlik assosiasiýasy we «Serpentine» galereýasy bilen bilelikde iki günlük ylmy-amaly maslahat hem geçiriler.

Bu maslahat Zaha Hadidiň aradan çykmagynyň 10 ýyllygy mynasybetli guralýar.