Beýik Britaniýaly 57 ýaşly Karl 28 ýylyň dowamynda 50 müň kilometrden gowrak pyýada ýol geçdi

Beýik Britaniýaly 57 ýaşly Karl Buşbi 1998-nji ýylyň noýabr aýynda Çiliniň günortasynda başlan syýahatyny tamamlady. Ol 28 ýylyň dowamynda 50 müň kilometrden gowrak aralygy pyýada geçdi we 29 döwletde boldy.

Buşbi syýahatyň dowamynda diňe pyýada ýöremek we ýüzmek arkaly öz öýüne tarap ýoluny dowam etdirdi. Syýahatyň dowamynda ol Kolumbiýa hökümeti bilen marksistik partizanlaryň arasynda güýçli söweşleriň barýan döwründe Darýen jülgesini pyýada geçdi.

Ol Bering bogazyny gündogardan günbatara pyýada kesip geçen ilkinji adam boldy. Şeýle hem, Hazar deňziniň üstünden 296 kilometr aralygy ýüzüp geçen ilkinji adam boldy.

Onuň ýolundaky iň soňky uly päsgelçilik La-Manş bogazy boldy. Buşbi 5-nji oktýabrda Fransiýadan Angliýanyň Dowr şäheriniň kenaryna ýüzüp geçdi. Bu ýüzüş üç güne bölünip, jemi 20 sagada golaý wagty aldy.

Kenarda ony kakasy, doganlary we dostlary garşy aldy. Şeýle hem, syýahatçy barada dokumental film düşürýän nemes režissýory Werner Gersog hem ony garşylady.

Emma syýahat entek doly tamamlanmady. Buşbi Angliýanyň demirgazygyndaky önüp-ösen Hall şäherine ýetmek üçin ýene-de takmynan 400 kilometr aralygy pyýada geçmeli bolar.