Baýrammyrat Atamanowyň çykyşy

Hormatly halkara ylmy-amaly maslahata gatnaşyjylar, hanymlar we jenaplar!

Arkadagly Gahryman Prezidentimiziň parasatly ýolbaşçylygynda Berkarar döwletiň täze eýýamynyň Galkynyşy döwründe Türkmenistan Watanymyz durnukly ösýän ýurt hökmünde dünýäde giňden tanalýar. Hormatly Prezidentimiziň möhüm ähmiýetli başlangyçlaryna we özgertmelerine laýyklykda ýurdumyzyň ykdysadyýetiniň ähli pudaklary, şol sanda ylym-bilim ulgamy maksatnamalaýyn we toplumlaýyn esasda kämilleşdirilýär.

Uniwersitetiň 7 fakultetinde, şol sanda Balkanabat bölüminde 1 fakultetde we 5 kafedrada, 17 hünär boýunça ýokary bilimli hünärmenler, 14 taýýarlyk ugry boýunça bakalawrlar we 5 taýýarlyk ugry boýunça magistrler taýýarlanylýar. Bu ýerde jemi 6,0 müňden gowrak talyp bilim alýar.

Uniwersitetiň 32 kafedrasynda 500-e golaý professor-mugallym zähmet çekýär. Olaryň 1-i Türkmenistanyň Ylymlar akademiýasynyň habarçy agzasy, 2-si professor, 3-si ylymlaryň doktory, 5-si dosent, 30-sy ylymlaryň kandidatydyr.

Uniwersitet 2013-nji ýylyň 25-nji iýulynda Halkara uniwersitetler bileleşiginiň agzalygyna kabul edildi we Ýewropa Biznes-Assambleýasynyň Sokrat komiteti (Europe Business Assembly, Oxford, UK) tarapyndan «Ýewropa hili» halkara baýragy bilen sylaglandy.

Ýokary bilimli hünärmenleri taýýarlamakda hem-de ylym-bilim ulgamynda gazanan uly üstünlikleri üçin Ýagşygeldi Kakaýew adyndaky Halkara nebit we gaz uniwersiteti «SEIN Assosiasiýasynyň altyn medaly» halkara bäsleşiginiň altyn medalyna, onuň nyşanyna hem-de diplomyna mynasyp boldy.

Beýik Britaniýanyň London şäherinde ýerleşýän THE (Times Higher Education) Bütindünýä reýting guramasy tarapyndan her ýylda geçirilýän «Impact Rankings 2022, 2023, 2024, 2025» hem-de «THE Sustainability Impact Ratings 2026» reýting görkezijileri boýunça uniwersitet Bütindünýä uniwersitetleriniň reýting sanawyna girizildi.

Şeýle hem THE (Times Higher Education) Bütindünýä reýting guramasy tarapyndan uniwersitetde alnyp barylýan ylmy-barlag we okuw-usuly işleriň netijeleri boýunça «World University Rankings 2023, 2024, 2025» Bütindünýä uniwersitetleriniň reýtinginiň sanawyna habarçy agza hökmünde girizildi.

2024-nji, 2025-nji we 2026-njy ýyllarda uniwersitet Indoneziýa uniwersiteti tarapyndan geçirilýän «UI Green Metric» Bütindünýä uniwersitetleriniň ekologik reýtinginiň sanawyna girizildi. 2024-nji ýylda Ýewraziýa Uniwersitetler Assosiasiýasynyň agzalygyna kabul edildi hem-de «Asia University Ranking 2024» reýting görkezijisi boýunça Bütindünýä uniwersitetleriniň reýtinginiň sanawyna habarçy agza hökmünde girizildi.

Şeýle hem Ýagşygeldi Kakaýew adyndaky Halkara nebit we gaz uniwersiteti 2023-nji ýylda Aziýa Uniwersitetler Assosiasiýasynyň assosirlenen agzalygyna we Tehniki Uniwersitetler Assosiasiýasynyň agzalygyna kabul edildi.

Ýagşygeldi Kakaýew adyndaky Halkara nebit we gaz uniwersitetiniň professor-mugallymlary, hünärmenleri we talyplary ýurdumyzda hem-de daşary ýurtlarda geçirilýän halkara olimpiadalara, ylmy-amaly maslahatlara we taslama bäsleşiklerine yzygiderli gatnaşyp, üstünlikli çykyş edýärler.

Ýagşygeldi Kakaýew adyndaky Halkara nebit we gaz uniwersiteti baglaşylan Ähtnamalaryň we Ylalaşyklaryň esasynda Gruziýanyň, Hytaý Halk Respublikasynyň, Malaýziýanyň, Birleşen Arap Emirlikleriniň, Awstriýa Respublikasynyň, Koreýa Respublikasynyň, Özbegistan Respublikasynyň, Rumyniýanyň, Russiýa Federasiýasynyň, Belarus Respublikasynyň, Germaniýa Federatiw Respublikasynyň ugurdaş ýokary okuw mekdepleri we kompaniýalary bilen ylym-bilim ulgamynda özara bähbitli netijeli hyzmatdaşlygy alyp barýar.

Şeýle hem Petronas, CNPC, Dragon Oil, ADNOC kompaniýalary bilen baglaşylan Ähtnamalaryň çäklerinde uniwersitetiň talyplary we mugallymlary her ýyl Malaýziýada, Hytaý Halk Respublikasynda we Birleşen Arap Emirliklerinde tomusky okuw-önümçilik tejribeliklerini hem-de hünär derejesini ýokarlandyrmak boýunça okuwlary geçýärler.

Ýagşygeldi Kakaýew adyndaky Halkara nebit we gaz uniwersiteti bilen Sukuba uniwersitetiniň arasynda hünärmenleri alyşmak, ylmy taslamalary amala aşyrmak we wodorod energetikasy merkeziniň barlaghanasyny döwrebaplaşdyrmak işlerine uly üns berilýär.

Häzirki wagtda uniwersitetiň bir mugallymy Ýaponiýanyň Sukuba uniwersitetinde wodorod energiýasy boýunça geçirilýän Ýaponiýanyň Halkara hyzmatdaşlyk agentliginiň «Durnukly Ösüş Maksatlary boýunça Ählumumy Lider» atly magistr okuw maksatnamasy esasynda hünär derejesini ýokarlandyrýar.

Türkmenistanyň Bilim ministrligi bilen Ýaponiýanyň Sukuba uniwersitetiniň arasynda wodorod energiýasy boýunça bilelikdäki ylmy-barlaglar babatda hyzmatdaşlyk etmek barada baglaşylan Özara düşünişmek hakynda Ähtnamanyň çäklerinde wodorod energiýasy boýunça hyzmatdaşlyk bilen bagly meseleleri ara alyp maslahatlaşmak maksady bilen, 2026-njy ýylyň 13–17-nji oktýabry aralygynda uniwersitetiň wekili Ýaponiýanyň Sukuba şäherinde iş saparynda boldy we Sukuba uniwersitetiniň Prezidenti Keýsuke Nagata bilen duşuşdy.

Şeýle hem Ýaponiýanyň Ykdysadyýet, söwda we senagat ministrliginiň (METI) Tebigy serişdeler we energetika agentliginiň, Täze energiýa we senagat tehnologiýalaryny ösdürmek guramasynyň (NEDO) hem-de «Chiyoda» korporasiýasynyň Kiyasu Research Park ylmy-barlag merkeziniň tebigy gazdan wodorod ýangyjyny almak boýunça alyp barýan ylmy-barlag işleri we önümçiligi bilen tanyşyldy.

Hormatly Arkadagly Gahryman Prezidentimiziň Hytaý Halk Respublikasyna amala aşyran döwlet saparynyň dowamynda 2023-nji ýylyň 6-njy ýanwarynda kabul edilen Türkmenistanyň we Hytaý Halk Respublikasynyň Bilelikdäki Beýannamasynda Lu Ban ussahanasy taslamasyny bilelikde amala aşyrmagy ilerletmek baradaky teklip öňe sürüldi.

2024-nji ýylyň 18-nji oktýabrynda Hytaý Halk Respublikasynyň Sian şäherinde «Ýagşygeldi Kakaýew adyndaky Halkara nebit we gaz uniwersiteti bilen Sian nebit uniwersitetiniň, Hebeý nebit hünär-tehniki uniwersitetiniň, Hytaýyň milli nebitgaz korporasiýasynyň we Hytaýyň bilim ulgamynda halkara alyş-çalyş assosiasiýasynyň arasynda özara düşünişmek hakynda Ähtnama» baglaşyldy.

Ähtnamanyň çäklerinde 2026-njy ýylyň 16-njy aprelinde Ýagşygeldi Kakaýew adyndaky Halkara nebit we gaz uniwersitetiniň çäginde ýerleşýän Türkmenistandaky Lu Ban ussahanasy dabaraly ýagdaýda açylyp ulanmaga berildi.

Häzirki wagtda Lu Ban ussahanasynda «Gazylyp alynýan peýdaly magdanlaryň geologiýasy we gözlegi» hem-de «Maglumat ulgamlary we tehnologiýalary (nebitgaz pudagynda)» taýýarlyk ugurlary boýunça Hytaýyň ugurdaş ýokary okuw mekdepleriniň professor-mugallymlary bilen bilelikde ýokary derejeli bakalawrlar taýýarlanylyp başlandy.

Ýagşygeldi Kakaýew adyndaky Halkara nebit we gaz uniwersitetinde sanly we emeli aň tehnologiýalaryny hünärmenleri taýýarlamakda giňden ulanmak boýunça işler yzygiderli alnyp barylýar.

Uniwersitetiň mugallymlarynyň, hünärmenleriniň we talyplarynyň gatnaşmagynda jemi 160-dan gowrak programma üpjünçiligi işlenip düzüldi we olar boýunça Türkmenistanyň Intellektual eýeçiligi boýunça Döwlet gullugy tarapyndan bellenilen tertipde awtorlyk şahadatnamalary alyndy.

Bu programmalar okuwa gözegçilik etmekde, bilim bermekde we başarnyklary barlamakda uly ýardam berýär.

Olaryň arasynda «Antiplagiat» programmasy emeli aňy ulanmak arkaly ýyllyk we diplom işleriniň, makalalaryň, kitaplaryň we beýleki döredijilik işleriniň plagiat derejesini anyklamak boýunça öz mümkinçiliklerini yzygiderli kämilleşdirýär.

Kibersimulýator programmalary bolsa hünärmenleri dürli synaglardan geçirmek üçin dürli çylşyrymly ýagdaýlary döredip, olaryň iş şertlerine taýýarlyk derejesini ýokarlandyrýar.

Uniwersitetde elektron uniwersitet ulgamyny döretmek ugrunda hem işler ýokary depginde alnyp barylýar. Häzirki wagtda bir kafedranyň mysalynda işleriň ähli ugurlaryny doly derejede sanly ulgama geçirmek boýunça işler tamamlanyp barýar.

Elektron uniwersitet ulgamy geljekde bilim bermek, bilimi barlamak, okuwyň hilini seljermek ýaly işleri düýpli kämilleşdirmäge mümkinçilik berer.

2026-njy ýylyň 5-nji noýabrynda Ýagşygeldi Kakaýew adyndaky Halkara nebit we gaz uniwersitetiniň, Hytaý Halk Respublikasynyň Hytaýyň nebit uniwersitetiniň, Sian nebit uniwersitetiniň we Hebeý nebit hünär-tehniki uniwersitetiniň talyplarynyň arasynda uniwersitetiň çäginde ýerleşýän Türkmenistandaky Lu Ban ussahanasynda Halkara açyk informatika internet olimpiadasy geçiriler.

Şeýle hem 2026-njy ýylyň 25-nji noýabrynda Ýagşygeldi Kakaýew adyndaky Halkara nebit we gaz uniwersitetinde «Ylym-bilim ulgamynda sanly tehnologiýalar, emeli aň we kiberhowpsuzlyk: ylmy-tehnologik ösüşiň häzirki zaman ugurlary» atly utgaşykly görnüşdäki halkara ylmy-amaly maslahaty we sergini geçirmek meýilleşdirilýär.

Sizi bu geçiriljek halkara foruma işjeň gatnaşmaga çagyrýarys.

Diňläniňiz üçin köp sag boluň!

Baýrammyrat Atamanow