«Altyn topuň» 8 gezek eýesi Lionel Messä Ispaniýada halkara sylag gowşuryldy

Lionel Messi sport älemindäki hyzmatlary üçin halkara derejesindäki uly baýraga eýe boldy.

«Altyn top» baýragynyň 8 gezek eýesi bolan meşhur argentinaly hüjümçi Lionel Messi sporty ösdürmäge we wagyz etmäge goşan uly goşandy üçin Asturiýa şa gyzynyň baýragy bilen sylaglandy. Bu barada sylaglaşdyryş gaznasynyň resmi internet sahypasynda habar berilýär.

Dabara Ispaniýanyň Owýedo şäherinde ýerleşýän taryhy «Kampoamor» teatrynda geçirildi.

1980-nji ýyldan bäri gowşurylyp gelinýän bu baýraga ozal hem birnäçe meşhur türgenler mynasyp bolupdy. Mysal üçin, 2025-nji ýylda sport ugry boýunça bu sylag amerikaly tennisçi Serena Wilýamsa berlipdi.

Şeýle hem dürli ýyllarda ispan futbolçylary Iker Kasilýas hem-de Hawi, mundan başga-da 2002-nji we 2010-njy ýyllarda dünýä çempiony bolan Braziliýanyň we Ispaniýanyň milli ýygyndylary bu baýragyň eýeleri bolupdylar.

Häzirki wagtda 39 ýaşly hüjümçi 2023-nji ýyldan bäri ABŞ-nyň «Inter Maýami» klubynda çykyş edýär. Bütin karýerasynyň dowamynda «Barselona» we Fransiýanyň «Pari Sen-Žermen» ýaly abraýly klublarynda oýnan Messi jemi 48 sany kubok gazandy.