Daşkentde geçiriljek halkara biýennalede türkmen suratkeşleriniň döredijiligi tanyşdyrylar

Häzirki zaman sungatynyň XI Daşkent halkara biýennalesiniň maksatnamasynyň çäklerinde 15-nji oktýabrda türkmen nakgaşlarynyň çeper eserlerinden ybarat aýratyn serginiň açylyş dabarasy geçiriler.

Milli baý mirasy we häzirki zaman şekillendiriş sungatynyň özboluşly aýratynlyklaryny özünde jemleýän bu ekspozisiýada Türkmenistanyň ykrar edilen ussat nakgaşlary — Azat Myradowyň, Gunça Myradowanyň hem-de Toýly Çopanowyň nepis döredijilik işleri köpçülige hödürlener.

Milli sungat forumyny guramaçylykly geçirmekde aşakdaky edaralar bilelikde çykyş edýärler:

• Özbegistanyň Çeperçilik akademiýasy;

• Özbegistanyň Suratkeşler döredijilik birleşigi;

• Çeperçilik sergileriniň müdiriýeti.