Huawei arzan bahaly smartfon bazarynda täze «Starlight» brendini taýýarlaýar

Hytaýyň tehnologiýa ägirdi Huawei elýeterli smartfon segmentinde bäsleşigi güýçlendirmek üçin «Starlight» (Hytaý bazarynda «Xingmang» ady bilen) diýlip atlandyrylýan täze subbrendini hödürlemäge taýýarlanýar.

Täze tapgyryň esasan internet dükanlary arkaly satylmagyna we Redmi, iQOO hem-de Realme ýaly bazarda durnukly orun eýeleýän markalar bilen bäsleşmegine garaşylýar.

Häzirki wagtda Mate hem-de Pura seriýalary bilen flagman segmentini, Nova bilen dizaýn we foto ugruny, Enjoy bilen bolsa iň arzan modelleri öz içine alýan Huawei, Starlight brendini orta we elýeterli basgançaklaryň arasynda ýerleşdirmegi meýilleşdirýär.

Bu ädim Huawei-iň öňki Honor brendi bilen ýöreden üstünlikli ýoluny ýatladýar. Honor hem ilki onlaýn satylýan elýeterli brend hökmünde çykyp, soňra özbaşdak iri kompaniýa öwrülipdi.

Täze brendiň ýene bir esasy maksady — HarmonyOS operasion ulgamynyň ulanyjy binýadyny has-da giňeltmekdir.

Häzirki wagtda HarmonyOS 6 we 7 gurluşlarynda işleýän enjamlaryň sany 90 milliondan geçdi. Arzan bahaly enjamlaryň köpçülige hödürlenmegi hem ulanyjylaryň sanyny artdyrar, hem-de programma düzüjileri täze programma üpjünçiliklerini döretmäge höweslendirer.

Şeýle-de bolsa, Huawei tarapyndan Starlight brendiniň işe giriziljekdigi barada resmi beýanat berilýänçä, taslamanyň geljegi enjamlaryň soňky bahasyna we alyjylaryň gyzyklanmasyna bagly bolup galýar.