«Wildlife Photographer of the Year» bäsleşiginiň baş baýragy piliň suratyna berildi

Londonyň Tebigy taryh muzeýiniň guramagynda her ýyl geçirilýän meşhur «Wildlife Photographer of the Year» halkara bäsleşiginiň nobatdaky ýeňijileri belli boldy.

Bu gezekki bäsleşik gatnaşyjylaryň sany boýunça uly rekord goýup, dünýäniň 121 döwletinden 65 müňden gowrak iş kabul edildi.

Fotobäsleşigiň iň esasy şerti — suratyň tebigylygyny we hakykylygyny üýtgetmän saklamakdyr. Guramaçylar 2024-nji ýyldan bäri emeli aňyň kömegi bilen döredilen suratlary bäsleşige kabul etmeýärler.

Şeýle hem fotoredaktorlar arkaly surata goşmaça zat goşmak ýa-da obýektleri aýyrmak doly gadagan edilýär. Bäsleşigiň jemleýji tapgyryna geçenler suratyň asyl nusgadaky RAW faýllaryny eminlere tabşyrmaly bolýarlar.

Iň ýokary baýraga italiýaly fotosuratçy Federiko Weroneziniň «Netijeler» atly işi mynasyp görüldi.

Fotoçy Namibiýanyň Huab derýasynyň guran hanasynda pil sürülerini yzarlap ýörkä, çägede geň yzlara duş gelipdir. Ol yzlaryň yzy bilen gidip, diýseň gynançly bir pursatyň şaýady bolupdyr.

Suratyň merkezinde ölen çagajygyny holtumy we pyşbaga dişleriniň arasynda gysyp, çöl boýunça göterip barýan ene pil şekillendirilipdir.

Alymlaryň bellemegine görä, piller ýakynlaryny ýitirenlerinde özlerini düýpli başgaça alyp barýarlar. Olar ölen piliň jesedini hem-de süňklerini sypalaýarlar, jesediň töwereginde durup, ony beýleki haýwanlardan goraýarlar.

Şeýle hem olar ýörite gynançly sesleri çykaryp, käwagt ölen balalaryny uzak aralyklara göterip äkidýärler.