Getty Images kompaniýasy 533 million dollar maýa çekmegi meýilleşdirýär

Dünýä belli media serişdelerini, iri kompaniýalary we awtorlary foto, wideolar hem-de illýustrasiýalar bilen üpjün edýän Getty Images fotobanky ABŞ-nyň Bankrotlyk baradaky kazyýetine arza berdi.

Kompaniýa karz berijilerden korporatiw gorag almagy hem-de maliýe gurluşyny täzeden seretmegi maksat edinýär. Getty Images bu guramaçylykly üýtgeşmeleri 2026-njy ýylyň ahyryna çenli tamamlamagy we 533 million dollara çenli goşmaça maýa goýumyny çekmegi meýilleşdirýär.

Bu işler doly tamamlanandan soň, fotobankyň ähli taslamalary Getty Images bilen baglanyşykly düzümlere hem-de bu ugurda 143 million dollara çenli maliýe goldawyny berjek Koch Equity Development kompaniýasyna geçer.

Delawer ştatynyň kazyýetine tabşyrylan resmi resminamalara görä, kompaniýanyň umumy aktiwleri we borçnamalary 1 milliarddan 10 milliard dollara çenli möçberde görkezilýär.

Kompaniýanyň wekilleri öz işlerini adaty tertipde dowam etdirjekdiklerini we bu maliýe tapgyrynyň fotoawtorlara, hyzmatdaşlara, müşderilere hem-de işgärler toparyna hiç hili ters täsir etmejekdigini nygtadylar.

Şeýle hem Getty Images-yň maliýe ýagdaýynyň çylşyrymlaşmagyna esasy bäsdeşi bolan Shutterstock bilen birleşmek baradaky ylalaşygyň şowsuz tamamlanmagy, ýokary möçberli bergiler we emeli aň tehnologiýalarynyň çalt ösmegi sebäp boldy.

Häzirki zaman emeli aň gurallary adaty foto agentlikleriniň hyzmatlaryna bolan zerurlygy ep-esli azaldýar.