FIDE nusgawy küşt boýunça wagt kadalaryna täze üýtgeşmeleri hödürledi

Halkara küşt federasiýasynyň (FIDE) Baş assambleýasy nusgawy küşt ýaryşlarynda oýun üçin berilýän wagty gysgaltmak baradaky başlangyjy makullady.

Täze düzgünnama laýyklykda, indi guramanyň ýörite rugsady bolmazdan hem bäsleşikleri 60 minut we her bir göçüm üçin 30 sekunt goşulýan (60+30) görnüşde, aýratyn şertlerde bolsa 45+30 tertibinde geçirmek mümkin bolar.

Bu girizilýän düzgünleriň doly güýje girmegi üçin olaryň FIDE-niň geňeşinde seredilip, tassyklanmagyna garaşylýar.

Şu wagta çenli ýokary derejeli nusgawy bäsleşiklerde bir oýun üçin azyndan 90 minut we her göçüm üçin 30 sekunt (90+30) berilýärdi. Täze teklibe garamazdan, bu 90+30 görnüşi esasy wagt kadasy hökmünde öz möhümligini saklap galar.

Küştçüler halkara atlar we halkara derejeler berilýän ýaryşlarda bir günde ikiden köp oýun oýnap bilmeýärler. Halkara derejeleri üçin gysgaltylan wagt tertibinde gazanylan görkezijileriň diňe bir normasy hasaba alynýar.

Dünýä reýtingine täsir edýän bäsleşiklerde türgenler bir günde 12 sagatdan köp oýnamaly däl we şu wagtyň dowamynda ikiden köp duşuşyk geçirmäge rugsat berilmeýär.