Arheologlar Türkiýäniň kenarynda dünýäniň iň gadymy suw asty gämisini tapdylar

Türkiýäniň Antalýa welaýatynyň Kekowa adasynyň golaýynda alymlar deňiz düýbünden irki bürünç eýýamyna degişli bolan gäminiň galyndylaryny ýüze çykardylar.

Tapyndynyň taryhy takmynan 4400–4700 ýyl ozala — Müsürdäki Beýik piramidalaryň gurulýan döwrüne gabat gelýär.

Bu täze açyş ozal Gresiýanyň Dokos adasynyň golaýynda tapylan 4200 ýyllyk gäminiň rekordyny täzeledi hem-de ony dünýä boýunça iň gadymy suwa giden gämi hökmünde bellemäge mümkinçilik berdi.

Gäminiň agaç bölekleri we göwresi biziň günlerimize çenli saklanmandyr. Emma hünärmenleriň çaklamalaryna görä, onuň uzynlygy 10 metre golaý bolup, Ortaýer deňzinde haryt daşaýan söwda gämisi hökmünde ulanylypdyr.

Suwasty ekspedisiýanyň guwwaslary ol ýerden 3 sany uly daş labyry hem-de 30-dan gowrak keramika gaplaryny tapyp, suwuň ýüzüne çykardylar.

Konteýnerleriň käbirinde ozalky harytlaryň yzlary saklanyp galypdyr. Häzirki wagtda olaryň içindäki maddalary takyk anyklamak üçin konserwasiýa we barlag işleri dowam etdirilýär.

Alymlar gäminiň Ortaýer deňziniň gündogar kenarlaryndan ýola çykyp, harytlary gadymy Troýa şäherine ýa-da Krit adasyndaky Minoý siwilizasiýasyna tarap äkitmäge synanyşandygyny çaklaýarlar.